Kryetarja e Autoritetit të Mediave Audiovizive, znj. Armela Krasniqi, ka zhvilluar ditën e sotme një takim me përfaqësuesit e misionit vëzhgues parazgjedhor të Asamblesë Parlamentare të Këshillit të Europës. Takimi është realizuar në kuadër të turit të takimeve që ky delegacion ka organizuar me përfaqësues të disa institucioneve shqiptare. Në takim, Kryetarja Krasniqi i është përgjigjur interesit të vëzhguesve të Asamblesë Parlamentare mbi angazhimin e AMA-s në monitorimin e procesit zgjedhor, pavarësinë e institucionit, transparencën e pronësisë së medias – një proces tashmë i përfunduar – rregullimin e Platformave të Shpërndarjes së Videove, etj.
Javën e ardhshme, me nisjen e fushatës elektorale, AMA angazhohet plotësisht në një proces shumë të rëndësishëm siç është ai i monitorimit të zgjedhjeve. Si një proces i nisur për herë të parë në zgjedhjet e vitit 2021, ky monitorim zhvillohet bazuar në Metodologjinë e Komisionit Qendror të Zgjedhjeve (KQZ). Gjetjet e këtij monitorimi, të identifikuara në edicionet informative, emisionet debatuese/forumet, reklamat politike, mbulimet e drejtpërdrejta të aktiviteteve elektorale, etj., AMA ia raporton KQZ-së.
