“Një fjali në studio” – Pse iu pezullua leja e transmetimit Radio Holger?

Këtë herë, cikli “Një fjali në studio” sjell një rast nga Danimarka, vend anëtar i Bashkimit Evropian.

Në verën e vitit 2005, pas sulmeve në Londër, drejtuesi i Radio Holger, një radio lokale në Kopenhagë, foli në mikrofon për mënyrën se si, sipas tij, duhej luftuar terrorizmi. Ai propozoi dëbimin e myslimanëve të huaj nga Evropa Perëndimore.

Këshilli danez i Radios dhe Televizionit e hapi çështjen me nismën e vet. Ai shqyrtoi emisionin në tërësi dhe vlerësoi se gjatë tij u përsëritën deklarata të rënda kundër myslimanëve. Sipas Këshillit, transmetimi nxiste urrejtje dhe shkeli disa herë kushtet e lejes së transmetimit.

Këshilli e cilësoi shkeljen shumë të rëndë dhe ia pezulloi Radio Holger lejen e transmetimit për tre muaj.

AMA sjell këtë rast për të parë se si trajtohet përgjegjësia e medias në vendet e Bashkimit Evropian. Në diskutimet për vendimet e AMA-s, ia vlen të shohim se çfarë shqyrtojnë rregullatorët në raste të ngjashme. Në këtë rast, Këshilli danez shqyrtoi se çfarë iu tha dëgjuesve dhe si u përsëritën gjatë emisionit deklaratat që nxisnin urrejtje.

Burimi i rastit është raporti vjetor për vitin 2005 i Këshillit danez të Radios dhe Televizionit.

Perpara AMA publikon të dhënat për vjetërsinë në punë në mediat shqiptare, 33% e punonjësve në televizione kanë 1–3 vite përvojë

Na ndiqni në rrjete sociale:

Copyright 2026 | Autoriteti Mediave Audiovizive | Të drejtat e rezervuara