Kryetarja e Autoritetit të Mediave Audiovizive, Armela Krasniqi, priti, të martën, përfaqësuesit e NP Radiodifuzionit Nacional të Maqedonisë së Veriut, Endrin Kadriu, drejtor dhe Lumnim Junuzi, Shef kabineti, si dhe Arben Saiti, Udhëheqës i Sektorit për mbështetje Informatike dhe punë të përgjithshme, në Agjencinë e Medias për Shërbimet Audio dhe Audiovizive, AVMU.
Kryetarja e AMA-s e informoi delegacionin maqedonas me punën dhe rezultatet konkrete të angazhimit të Autoritetit për administrimin e Spektrit të Frekuencave audio-audiovizive, për aktet ligjore e nënligjore të përafruara me legjislacionin përkatës të BE-së, për domosdoshmërinë e bashkëpunimit me fqinjët në këtë proces, për mbështetjen dhe tarifat e mbartjes në rrjetin e transmetuesit publik, për nevojën e respektimit të standardeve bashkëkohore teknike e teknologjike etj.
Përfaqësuesit e NP Radiodifuzionit Nacional të Maqedonisë së Veriut, paraqitën një informacion përmbledhës mbi gjendjen aktuale dhe mënyrën e shpërndarjes së frekuencave në vendin e tyre, kërkesat ligjore për transmetuesit publikë e privatë, raportet dhe problematikat e mënyrave të licencimit të ofruesve të shërbimit në internet, nevojën e përmirësimit të infrastrukturës e teknologjisë bashkëkohore, si dhe kualifikimin e vijueshëm të burimeve njerëzore, përkatësisht personelit inxhiniero-teknik.
Zonja Krasniqi i siguroi miqtë nga Maqedonia e Veriut për gatishmërinë e AMA-s lidhur me bashkëpunimin e mëtejshëm, për shkëmbim përvoje dhe ekspertësh në procese me interes të përbashkët, për të dy vendet, por edhe për rritjen e performancës e të cilësisë së transmetimeve audiovizive.
AUTORITETI I MEDIAVE AUDIOVIZIVE
