Autoriteti i Mediave Audiovizive në bashkëpunimin me qytetarët dhe platformën TikTok, kanë arritur të heqin nga platforma 38 përmbajtje të dëmshme dhe 1140 foto/video të raportuara për pirateri, nga 4 shkurti në 25 maj 2026.
Sipas të dhënave të publikuara, nga momenti i raportimit deri më tani janë shqyrtuar 152 ankesa të ardhura në AMA. Nga këto, 47 raste janë vlerësuar si shkelje të ligjit. Prej tyre, 38 video/audio janë hequr nga platforma, ndërsa 9 të tjera janë ende në proces shqyrtimi.
Nga 38 përmbajtjet e hequra, 20 video lidhen me ekspozimin e fëmijëve ndaj pornografisë, narkotikëve, alkoolit, duhanit dhe dhunës. Nga këto, 17 video janë hequr për nxitje dhune dhe urrejtjeje, ndërsa 1 audio për gjuhë që tejkalon standardet morale dhe etike.
Sa i përket piraterisë, AMA raporton se gjatë kësaj periudhe janë regjistruar 1140 raste të raportuara për pirateri, të cilat përfshijnë 569 foto dhe 571 video. Si pasojë e ndërhyrjeve, të gjitha përmbajtjet e raportuara janë hequr nga platforma, ndërsa aktualisht nuk ka raste në proces shqyrtimi. AMA thekson se çdo ankesë është trajtuar me përgjegjësi të plotë dhe në zbatim të dispozitave ligjore.
