Kryetarja e Autoritetit të Mediave Audiovizive takoi në Kosovë kryeshefin ekzekutiv të Komisionit të Pavarur të Mediave, Z. Niman Racaj, anëtarin e KPM, Fitim Veliu dhe zyrtarë të tjerë të rregullatorit të Kosovës për të diskutuar mbi sfidat aktuale të tregut mediatik.
Në takim u trajtuan procese të rëndësishme të rregullimit, si transpozimi i Aktit Europian për Lirinë e Medias, EMFA, Akti i Shërbimeve Digjitale, DSA, në legjislacionin shqiptar dhe harmonizimin e këtyre akteve në atë të Kosovës.
Një çështje tjetër e rëndësishme që u diskutua në këtë ishte rregullimi i Platformave të Shpërndarjes së Videove. Kryetarja e AMA-s Znj. Armela Krasniqi u tha të pranishmëve se në vitin 2023, AMA i ka përfshirë ato në ligjin “Për mediat audiovizive në Republikën e Shqipërisë”, i ndryshuar dhe ka hartuar ndërkohë Rregulloren mbi “Parimet përgjithshme dhe kërkesat e posaçme për Platformat e Shpërndarjes së Videove”.
“Aktualisht jemi plotësisht të angazhuar në proceset ndërinstitucionale të transpozimit të legjislacionit shqiptar me Aktin e Shërbimeve Digjitale, si instrumenti më i mirë ligjor për rregullimin e realitetit virtual mediatik” – tha Krasniqi.
Pirateria televizive ishte gjithashtu pjesë e diskutimeve si një fenomen shqetësues për çdo rregullator, ndaj dhe shkëmbimi i eksperiencave mes rregullatorëve është shumë i rëndësishëm.
