Kryetarja e Autoritetit të Mediave mori pjesë në Konferencën e 11-të Rajonale të Medias në Europën Juglindore (SEEMC), organizuar nga OSBE përmes Përfaqësuesit për Lirinë e Medias (RFoM), me temë “Forcimi i gazetarisë si një e mirë publike”.
Znj. Krasniqi ishte pjesë e panelit “Transparenca e pronësisë së medias në praktikë: Një analizë krahasuese rajonale”, së bashku me Olaf Steenfadt themelues dhe drejtor i Regjistrit Global të Medias, Leunora Kaliqi, Presidente e Bordit të Këshillit të etikës së medias, në Maqedoninë e Veriut nën moderimin e Marius Dragomir drejtor i Qendrës Kërkimore të Medias dhe Gazetarisë.
Gjatë prezantimit të saj, Krasniqi tregoi punën e Autoritetit të Mediave Audiovizive në ndërtimin dhe publikimin e regjistrit të transparencës së pronësisë së medias audiovizive, një bazë të dhënash e plotë dhe e detajuar deri te përfituesit fundorë dhe aksesueshme në faqen zyrtare të AMA-s.
Ajo u ndal gjithashtu te ndryshimet ligjore të miratuara në janar të këtij viti, që lidhen me forcimin e transparencës së pronësisë në media, si dhe te të dhënat që AMA publikon në Buletinin Periodik, ku përfshihen edhe informacionet mbi investimet e subjekteve mediatike në fusha të tjera të biznesit.
Diskutimet dhe prezantimet në Konferencën e 11-të Rajonale të Medias në Europën Juglindore, u vlerësuan si një mundësi e rëndësishme për shkëmbimin e eksperiencave, forcimin e bashkëpunimit rajonal dhe krijimin e urave të reja të bashkëpunimit.
