ANKESË MBI PIRATERINË
DHE/OSE TRANSMETIME NË KUNDËRSHTIM ME LIGJIN1

Ankesat për:

• Pirateri (transmetim dhe/ose përsëritje të programeve (kanaleve) të të tretëve pa marrëveshje me mbajtësit e të drejtave të transmetimit të tyre;
• Transmetimin e programeve, përfshirë veprat kinematografike, pa marrëveshje me mbajtësit e të drejtave të këtyre veprave;
• Veprimtari audio dhe/ose audiovizive të paautorizuar, ose të palicencuar nga AMA;
• Pajisjet transmetuese të OSHMA-së që shkaktojnë interferenca të dëmshme, pavarësisht se për përdorimin e tyre është marrë licenca ose autorizimi përkatës nga AMA;

Ligji nr. 97/2013 “Për mediat audiovizive në Republikën e Shqipërisë”, i ndryshuar, përcakton:

Neni 32

Rregulla të përgjithshme për ofruesit e shërbimeve mediatike audio dhe/ose audiovizive

6. OSHMA-të duhet të transmetojnë programet, përfshirë veprat kinematografike, në përputhje me kushtet dhe afatet për të cilat kanë nënshkruar marrëveshje me mbajtësit e të drejtave të këtyre veprave.

Neni 78

Inspektimi i veprimtarisë së të licencuarit/të autorizuarit

1. AMA ka të drejtë të ushtrojë kontroll të veprimtarisë programore, financiare, teknike dhe organizative të mbajtësit të një licence dhe/ose autorizimi, sipas përcaktimeve të këtij ligji. Çdo inspektim, veçanërisht inspektimi i veprimtarisë programore, nuk duhet të cenojë lirinë e shprehjes. I licencuari bashkëpunon me AMA-n për realizimin e këtij funksioni.

2. AMA autorizon nëpunës të specializuar të administratës së vet apo persona të tjerë të specializuar për të realizuar këtë inspektim nëse:

1. ekzistojnë shkaqe të arsyeshme, që tregojnë se i licencuari dhe/ose i autorizuari nuk realizon shërbimin në përputhje me kushtet e licencës dhe/ose autorizimit;
2. realizimi i shërbimit të ofruar nga i licencuari shkakton interferenca;
3. ka informacion për veprimtari të palicencuar dhe/ose të paautorizuar;
4. ka një njoftim të përligjur nga një palë e tretë e interesuar.

….

Neni 79

Monitorimi i spektrit të frekuencave

1. AMA monitoron brezat e frekuencave, të caktuara në Planin Kombëtar të Frekuencave për transmetime audiovizive, me qëllim që:

1. përdorimi i frekuencave të dhëna me licencë të jetë në përputhje me kuadrin ligjor dhe rregullator në fuqi, në zbatim të kushteve të licencës;
2. spektri i frekuencave të përdoret vetëm nga përdoruesit e lejuar, sipas dispozitave të këtij ligji;
3. të krijojë një mjedis të përshtatshëm dhe pa interferenca të dëmshme për operimin e sistemeve dhe të stacioneve të transmetimit audioviziv, që do të përdoren për qëllime private ose publike.

….

Neni 80

Bllokimi i pajisjeve dhe/ose ndalimi i funksionimit të tyre

1. Kur një person fizik apo juridik zhvillon veprimtari në fushën e transmetimeve audio dhe/ose audiovizive, të palicencuar nga AMA, personat e autorizuar nga AMA bllokojnë pajisjet.

….

5. Kur personat e autorizuar nga AMA zbulojnë se pajisjet transmetuese të OSHMA-së shkaktojnë interferenca të dëmshme, pavarësisht se për përdorimin e tyre është marrë licenca ose autorizimi përkatës, kanë të drejtë të bëjnë ndalimin e funksionimit të tyre.

ANKESAT E PUBLIKUT

Manaxhimi financiar i AMA-s

Autoriteti I Mediave Audiovizive është një institucion publik me vetëfinancim. Ligji nr. 97/2013 “Për mediat audiovizive në Republikën e Shqipërisë”, I ndryshuar, përcakton burimet e financimit të AMA-s, ky zëri kryesor është pagesa vjetore për licencë/autorizim. Masa e kësaj tarifë caktohet me vendim të AMA-s, dhe përllogaritet bazuar në parimet e objektitvitetit, transparencës, jodiskriminimit dhe proporcionalitetit. Pagesat vjetore përcaktohen të diferencuar sipas llojit të licencës/autorizimit, zonës së mbulimit, rrjetit ku ofrohet shërbimi etj.

Rreth masave të tarifave të përcaktuara për licencat/autorizimet që jep AMA

Në rast se operatorët e licencuar/autorizuar nga AMA, kanë papajtueshmëri me masën e përcaktuar nga Institucioni për shërbimin e ofruar nga ta, mund të shprehin arsyen dhe ta faktojnë atë.

ANKESAT E PUBLIKUT

Ankesat vlerësuar bazuar mbi Kodin e Transmetimit.

Publiku shqiptar prej dekadash gëzon një përvojë të gjatë në fushën e transmetimeve. Por mund të ndodhë që secili prej jush ndonjëherë të shohë në TV apo të dëgjojë në Radio një program në të cilin po cënohen parimet etike, dicka që ju e vlerësoni si ofendues apo që është e dëmshme.

Në cdo rast të tillë Këshilli i Ankesave merr një ankesë nga një shikues apo dëgjues, dhe e vlerëson atë në bazë të Kodit të Transmetimit, për të parë nëse ajo ka nevojë për shqyrtime të mëtejshme.

Kodi i Transmetimit i ka të mirëpërcaktuara standardet dhe rregullat etike për emisionet radiofonike dhe televizive dhe subjektet audivizive duhet t’i ndjekin këto rregulla.

Rreth Kodit të Transmetimit

Këto rregulla nuk përcaktojnë vetëm parimet etike që kanë të bëjnë me respektimin e lirive dhe të drejtave themelore të njeriut, me respektimin në mënyrë të vecantë të të drejtave të të miturve, respektimin e privatësisë, dinjitetit etj., por gjithashtu ato përfshijnë dhe fusha të tjera që kanë të bëjnë me rregullimin e veprimtarisë audiovizive në tërësi të subjekteve.

Për shembull, Kodi ka rregulla mbi atë se cfarë përmbajtje duhet të ketë në TV para orës 21:00.

Nëse ne konstatojmë se një program televiziv i ka thyer këto rregulla në shkelje të Kodit të Transmetimit, atëherë AMA do ta publikojë këtë vendim.