Tryezat e konsultimit publik, kanë vijuar në qytetet e Durrësit dhe Tiranës me operatorë të autorizuar nga AMA. Këto konsultime, bëhen për të diskutuar ndryshimet që propozon Autoriteti i Mediave Audiovizive në rregulloren, “Për kriteret dhe procedurat e dhënies së autorizimeve”.
Në ndryshimet e propozuara parashikohen kritere të reja lidhur me marrjen e autorizimit, masa përforcuese ligjore për subjektet, për të dhënë shërbimin për të cilin janë të autorizuar, por edhe masa lehtësuese sa i takon dokumentacionit që kërkohet nga OSHMA-të në kërkesën e tyre për autorizim apo rinovim autorizimi.
Kryetarja e AMA-s Znj. Armela Krasniqi u shpreh se sikurse në qarqe të tjera, edhe nga operatorët e autorizuar të Durrësit dhe Tiranës ka gjetur përkrahjen e tyre për ndryshimet në rregullore të cilat do ti japin fund manipulimit të shpërndarjes së sinjalit tokësor për qëllime që bien ndesh me licencimin dhe të drejtat e transmetimit.
Kryetarja e AMA-s u shpreh se lufta kundrejt paligjshmërisë dhe çdo veprimi që cenon konkurrencën dhe mbajtësit e të drejtave, s’do të ndalet.
