Kryetarja e Autoritetit të Mediave Audiovizive, znj. Armela Krasniqi priti në një takim z. Dmitri Moskovtsev, i shoqatës së Minoriteteve në Estoni, përfaqësuesit e Ministrisë estoneze të Kulturës, z. Artjom Tepljuk dhe znj. Julia Amor, si dhe Nënkryetarin e Komitetit të Pakicave Kombëtare, z.Sead Kazanxhiu.
Gjatë takimit u trajtua çështja e respektimit të të drejtave të minoriteteve në transmetimet audiovizive në Shqipëri.
Znj. Krasniqi ka shpjeguar mënyrën e funksionimit të institucionit, përcaktimet ligjore që garantojnë të drejtat e pakicave kombëtare, duke siguruar qasje në përmbajtjet audio dhe audiovizive pa dallim race apo përkatësie etnike, si dhe mbrojtjen e tyre nga diskriminimi në transmetimet audio/audiovizive.
“Ekipet e monitorimit dhe analizës në AMA ndjekin me kujdes respektimin, ndër të tjera, edhe të së drejtës së minoriteteve në përmbajtjet audiovizive, dhe lajmi i mirë është se nuk ka pasur raste që mund të evidentohen për shkeljen e legjislacionit në fuqi për pakicat”, ka thënë Krasniqi.
Garantimi i të drejtës së informimit të pakicave më gjuhën amtare, përveçse sigurohet me ligjin organik të AMA-s dhe Kodin e Transmetimit, është edhe pjesë e monitorimit periodik të transmetimeve të RTSH-së, që Autoriteti kryen, për të siguruar se ka emisione në gjuhën e pakicave dhe këto emisione kanë në përputhje me legjislacionin në fuqi.
