Në kuadër të propozimeve që Autoriteti i Mediave Audiovizive ka përgatitur për projektaktin “Për disa shtesa dhe ndryshime në Rregulloren “Për kriteret dhe procedurat e dhënies së autorizimeve”, Kryetarja e AMA-s, Znj. Armela Krasniqi ka vijuar konsultimet publike me OSHMA-të në Qarkun e Elbasanit.
Në këtë takim subjekteve të autorizuara ju paraqitën propozimet për ndryshimet, të cilat do të sjellin lehtësi në procedurat e rinovimeve të autorizimeve por gjithashtu do të forcojnë edhe kontrollin në tregun audioviziv.
Ashtu sikurse ndodhi në takimet e mëparshme, edhe përfaqësues të OSHMA-ve të Elbasanit shprehën dakordësinë e plotë në mbështetje të këtyre ndryshimeve, që do të frenojnë gjithashtu paligjshmërinë në tregun audioviziv.
“Jam e kënaqur që pas qarqeve të Kukësit e Dibrës, edhe në Elbasan gjetëm mbështetje të plotë nga sektori i industrisë për hapat që po hedhim. Dhe për ne në AMA ky është një lajm i mirë”, u shpreh Znj. Krasniqi.
Ky projektakt synon të përmirësojë më tej kuadrin rregullator për dhënien e autorizimeve, duke reflektuar zhvillimet aktuale të tregut mediatik, sfidat teknologjike dhe nevojën për forcimin e masave që garantojnë mbrojtjen e të drejtave të transmetimit, integritetin e sinjalit dhe konkurrencën e ndershme.
Autoriteti i Mediave Audiovizive do të vijojë turin e tryezave konsultative edhe në qytete të tjera të vendit, në funksion të përfshirjes sa më të gjerë të aktorëve të interesuar dhe për të garantuar që çdo ndryshim i propozuar në kuadrin nënligjor të bazohet në dialog të hapur, transparencë dhe mirëkuptim të ndërsjellë.
