Pas përfundimit me sukses të fushatës së edukimit mediatik, “Kompetencë mediatike për moshat parashkollore”, të zhvilluar në kopshtet e Tiranës urbane, me iniciativë të Këshillit të Ankesave në AMA, ka nisur fushata me shtrirje kombëtare, këtë herë e fokusuar te nxënësit e arsimit parauniversitar.
Fushata nisi me gjimnazistët e “Kostandin Kristoforidhit” në Elbasan ku kryetarja e AMA-s, Znj. Armela Krasniqi dhe Kryetarja e Këshillit të Ankesave Znj. Mirela Oktrova, bashkëbiseduan me nxënësit mbi rreziqet e dezinformimit, mbrojtjen e privatësisë online dhe rëndësinë e mendimit kritik në epokën digjitale.
Takimi i dytë u organizua në qytetin e Lezhës me gjimnazistët e shkollës së mesme “Hydajet Lezha” ku kryetarja e AMA-s u shpjegoi të rinjve rreziqet që fshihen pas ekranit të telefonit celular, lojës online, komunikimeve me të panjohur etj.
Sipas Krasniqit, akti i parë, ai i të menduarit kritik, është thelbësor për të qenë të sigurt në botën virtuale, përballë rreziqeve që lidhen me pasojat e gjuhës së urrejtjes, keqpërdorimit të të dhënave tona personale, dhunës, përmbajtjeve të dëmshme, abuzimeve të llojeve të ndryshme.
Nisma zhvillohet në bashkëpunim me Ministrinë e Arsimit, Agjencinë Kombëtare të arsimit parauniversitar dhe Agjencinë e Sigurimit të Cilësisë së arsimit parauniversitar dhe synon të fuqizojë ndërgjegjësimin e të rinjve për përdorimin e sigurt dhe të përgjegjshëm të medias dhe teknologjisë digjitale. Aktivitetet do të vijojnë në qytete të tjera të vendit gjatë vitit 2026.
