Autoriteti i Mediave Audiovizive ka hedhur për konsultim publik ndryshimet e propozuara në rregulloren, “Për kriteret dhe procedurat e dhënies së autorizimeve”. Për këtë qëllim, sot kryetarja e AMA-s, Znj. Armela Krasniqi ka ftuar në një tryezë diskutimi operatorët audiovizivë të Kukësit.
Në këtë tyrezë janë diskutuar propozimet për ndryshime, të cilat parashikojnë kritere të reja lidhur me marrjen e autorizimit, masa përforcuese ligjore për subjektet, për të dhënë shërbimin për të cilin janë të autorizuar, por edhe masa lehtësuese sa i takon dokumentacionit që kërkohet nga OSHMA-të në kërkesën e tyre për autorizim apo rinovim autorizimi.
Krasniqi ka theksuar vendosmërinë e Autoritetit në luftën kundër piraterisë në të gjitha format e saj, duke nënvizuar se institucioni qëndron në krah të subjekteve të ligjshme që respektojnë rregullat e tregut.
Përmes një thirrjeje publike, kryetarja e AMA-s ka ftuar gjithë qytetarët të denoncojnë çdo rast piraterie. “Paratë që shpenzoni për produkte të paligjshme janë para të hedhura në plehra”, ka thënë Krasniqi.
Gjithashtu ajo u ka bërë thirrje edhe operatorëve që të raportojnë çdo rast abuzimi që mund të konstatojnë gjatë ushtrimit të ligjshëm të të drejtave të tyre.
