Është koha për rregullimin ligjor në marrëdhëniet e punës së gazetarëve në redaksitë audiovizive

Edukimi për Median: “Takim i grupit të ekspertëve – Koordinimi dhe sinergjitë mes palëve për një komunikim të përgjegjshëm etik

Autoriteti i Mediave Audiovizive (AMA), dhe Këshilli i Ankesave, organizoi të hënën, më datë 21.05.2018, Tryezën e Rrumbullakët me temë Edukimi për Median: “Takim i grupit të ekspertëve – Koordinimi dhe sinergjitë mes palëve për një komunikim të përgjegjshëm etik.

Qëllimi i kësaj tryeze ishte ndërgjegjësimi i publikut të gjerë mbi konceptin paraprakisht se cfarë në thelb është edukimi mediatik. Mprehja e shqisës kritike tek qytetari kundrejt një prodhimi lajmesh e ndodhish në këtë bum teknologjik platformash të ndryshme. Nevoja e përfshirjes së Edukimit Mediatik si lëndë më vete në kurrikulat mësimore mbetet një nevojë emergjente që mund të vetërregullojë në mënyrë të drejtë dhe profesionale efektet e medias në jetën e njeriut dhe sidomos të fëmijëve.

Pjesë e kësaj Tryeze të Rrumbullakët që pati një mbështetje të vazhdueshme nga autoritetet e AMA-s, ishin anëtarë të Komisionit Parlamentar Për Edukimin dhe Mjetet e Informimit Publik, Ministrisë së Arsimit, Rinisë dhe Sporteve, Ministrisë së Shëndetësisë dhe Mbrojtjes Sociale, Departamentit të Gazetarisë dhe Komunikimit, përfaqësues të televizioneve, organizmave ndërkombëtarë, Institutit Shqiptar të Medias, studentë të gazetarisë etj.

Nënkryetari i Autoritetit të Mediave Audiovizive, z. Sami Nezaj, duke diskutuar për praktikat rregulluese dhe vetë-rregulluese, politikat, strategjitë dhe legjislacionin lidhur me edukimin në media, nënvizoi disa momente kyçe, që burojnë nga Kushtetuta e Shqipërisë (nenet 22 dhe 23) për median, dhe ligji për mediat audiovizive në Republikën e Shqipërisë. Për z. Nezaj, ky i fundit ka qasje periferike për edukimin në media, por ka disa momente që mund të perceptohen lidhur me edukimin në media, si p.sh. Këshilli i Ankesave.

Në fjalën e tij përshëndetëse z. Luçiano Boçi, anëtar i Komisionit parlamentar të Medias, tha se edukimi mediatik, edukimi i shoqërisë, ndërgjegjësimi i saj mund të konsiderohen prioritet. Sipas tij, lëndë të veçanta për edukimin mediatik duhet të ishin përfshirë tashmë në kurrikulat shkollore. Nëse disa vende i kanë me zgjedhje lëndë të tilla, për deputetin Boçi, në Shqipëri duhet të jenë të detyrueshme. Znj. Almira Xhembulla, gjithashtu anëtare e Komisionit Parlamentar Për Edukimin dhe Mjetet e Informimit Publik, theksoi nevojën për analizë të audiencës, por dhe të produktit që i ofrohet asaj. Ajo përmendi orientimin e Komisionit Evropian sa i përket edukimit në media dhe theksoi nevojën për të ecur edhe më tej me këtë detyrë.

Ndërsa znj. Doriana Dervishi, këshilltare në kabinetin e Ministrisë së Arsimit Rinisë dhe Sporteve, solli një panoramë të gjerë mbi kurrikulat shkollore, universitare por dhe parauniversitare. Sipas saj, ka institucione të arsimit të lartë, që kanë përfshirë module për gazetarinë dhe median, pra për edukimin mediatik. Pyetja është, shtroi znj. Dervishi, a duhen shtrirë këto module edhe në arsimin parauniversitar? Si shembuj të punës së vazhdueshme të Ministrisë së Arsimit në këtë fushë ajo solli projektin pilot për edukimin për fenë, si dhe modulet për të drejtën e informimit apo edukimin ekonomik në arsimin bazë.

Ilda Londo nga Instituti Shqiptar i Medias u ofroi të pranishmëve në këtë tryezë disa të dhëna nga indeksi mbi media në Shqipërisë. Ajo nënvizoi dy momente kryesore të këtij indeksi: i pari, që Shqipëria renditet ndër vendet më të papërgatitura lidhur me edukimin në media dhe i dyti, që publiku ka ende një shkallë të lartë besimi tek media në Shqipëri.

Për zv.drejtoreshën e Bibliotekës Kombëtare, znj. Etleva Domi, duhet një strategji kombëtare për edukimin mediatik, me pjesëmarrjen e shumë institucioneve, pasi në kohët e sotme, interneti dhe zhvillimet teknologjike diktojnë nevojën për një qasje të re ndaj kësaj teme.

Ndërsa z. Ramadan Çipuri, nga Departamenti i Gazetarisë në Universitetin e Tiranës, tha se roli i universiteteve për edukimin në media është parësor. Po aq parësor sa dhe bashkëpunimi me mediat i institucioneve të tjera. Ai parashtroi disa sugjerime në funksion të përmirësimit të situatës së medias në vend. Anëtarja e Bordit të AMA-s, znj. Suela Musta, solli rezultatet e një monitorimi të kryer prej saj për tri televizione, Klan, Top Channel dhe Vizion +, rreth spektakleve show që këto televizione transmetojnë. Sipas saj, janë vërejtur shkelje flagrante të Kodit të Transmetimit, sidomos ndaj imazhit të fëmijëve dhe keqpërdorimit të tyre. Sipas saj, fëmijët po përdoren për qëllime aspak të drejta.

Për ekspertin e medias, z. Rrapo Zguri jemi në epokën e konsumit të informacionit, ku gjithçka është e digjitalizuar, lehtësisht e riprodhueshme dhe e manipulueshme. Ndaj, shtoi ka, ka ardhur koha që të hapet një debat i gjerë: Ku fillon media? Z. Erald Kapri, anëtar i Këshillit të Ankesave pranë AMA-s, solli në vëmendjen raportin e fundit të “Soros”, ku Shqipëria renditet e parafundit për edukimin mediatik, si dhe shtjelloi mënyrat dhe mekanizmat shqiptarë për përfshirjen dhe edukimin e publikut. Znj. Karolina Risto, drejtore ekzekutive e InTV, duke sjellë përvojën e saj edhe si gazetare, dhe tashmë si drejtuese, foli për disa rrugë e mënyra se çfarë mund të bëjë media për të nxitur edukimin e publikut për informacionin. Sipas saj, duhen ndërmarrë iniciativa edhe për të përmirësuar profesionalizmin në media dhe për të zhvilluar mekanizma vetë-rregullues, si një mënyrë për të bashkëpunuar me publikun. Monika Stafa, Kryetare në Këshillin e Ankesave në fjalën e saj nënvizoi ndër të tjera se që në krye të herës duhet të shpjegojmë se cfarë d.th. edukimi mediatik. Ky term, i njohur gjerësisht si Media Literacy nënkupton që konsumatori i medias duhet të jetë në gjendje të bëjë disa pyetje lidhur me sa lexon online apo sheh në televizion. Ai duhet të dijë më së pari se cila media është burimi i informacionit, e më tej, kush është/janë pronarët e saj dhe ç’interesa kanë ata. Si konsumatorë të lajmeve gjithashtu qytetari duhet të mësohet të bëhet më kërkues, shtoi më tej Stafa, sepse aty ku burimet mungojnë dhe “faktet” kalojnë pakontrolluar, ka gjithmonë potencial për propagandë, dezinformim dhe abuzim.

Këshilli i Ankesave në AMA, do të mirëpresë nisma të tilla duke ftuar të gjithë partnerët ndërinstitucional për të bashkëpunuar në këtë çështje aq të ndjeshme së fundmi për të ardhmen e fëmijëve tanë.

Tiranë, më 21.05.2018

                            

                           Është koha për rregullimin ligjor në marrëdhëniet e punës së gazetarëve në redaksitë audiovizive

Komisioni për Edukim dhe Mjetet e Informimit Publik në Kuvendin e Shqipërisë dhe Autoriteti i Mediave Audiovizive, zhvilluan paraditen e datës 11 maj 2018 në Tiranë, Tryezën e Diskutimit mbi “Rregullimin ligjor në marrëdhëniet e punës së gazetarëve në transmetimet audiovizive”.

Në Tryezë ishin të ftuar përfaqësues nga të gjitha grupet e interesit: gazetarë, drejtues mediash, nga shoqatat dhe organizatat e tyre, anëtarë të parlamentit, profesorë të gazetarisë, institucionet shtetërore që mbulojnë aspekte të punësimit etj.

Ka kohë që për çështjen e rregullimit të marrëdhënieve të punës në mediat audiovizive janë të njohura problematika të hasura si, niveli i kushteve të punës së gazetarëve, format e rekrutimit dhe largimit nga redaksia, mosshlyerja në kohë e pagesave nga punëdhënësi, organizimi i gazetarëve ose mosorganizimi në shoqata, funksionaliteti i tyre etj.

Në Tryezë pati qëndrime të ndryshme nga diskutantët, por e përbashkëta ishte se tashmë pas rreth 28 viteve nga fillimet demokratike në vend, ka ardhur koha për veprime konkrete për të siguruar lirinë e medias. Pa një gazetar të sigurtë në punë nuk mund të kemi media të lirë dhe pluraliste, u tha nga diskutantët.

Kryetari i Autoritetit të Mediavë Audiovizive, z. Gentian Sala, në fjalën e tij theksoi se është e rëndësishme për lirinë dhe integritetin e medias standardi i burimeve njerëzore në median audiovizive. Ai evidentoi faktin se nga organizatorët e Tryezës priteshin propozime konkrete në lidhje me adresimin e problemeve, të cilat do të ishin gur themeli për ushtrimin e lirë të profesionit të gazetarit në vend. Nga ana tjetër, “AMA do të bëjë çështë e mundur në rrugë  ligjore, në bashkëpunim me gjithë aktorët e tjerë institucionalë, që të rregullojnë kushtet dhe shumë shpejt ata të kenë në dorë kontratën tip si fillim dhe më vonë kontratën kolektive”.

Znj. Albana Vokshi, Kryetare e Komisionit për Edukimin dhe Mjetet e Informimit Publik, dha nga ana e saj garancinë së Komisioni është vullnetplotë që të ndihmojë në përmirësimin e punës së gazetarëve në vend, mendim i cili u mbështet edhe nga Znj. Milva Ekonomi, zëvendëskryetare e Komisionit. Znj. Vokshi siguroi për solidaritet me gazetarët, duke qënë se ata janë rojtarët e shtetit të së drejtës. Ajo denoncoi rastet kur gazetarët, sipas saj, kanë qënë të censuruar dhe dha alarmin se gazetaria investigative është në  kushte jo të mira. Ajo theksoi se një gazetar me punë të keqrregulluar është një vegël në duart e pushtetit. Znj. Vokshi kërkoi nga institucionet kompetente monitorimin e punës së gazetarëve dhe transparencë nga ana e mediave të cilat janë punëdhënëse. Palët me ndikim duhet t’i kapërcejnë axhendat politike dhe të kenë vullnet për të siguruar media të lirë, përsëriti në Tryezë znj. Vokshi.

Znj. Milva Ekonomi, zëvendëskryetare e Komisionit për Edukimin dhe Mjetet e Informimit Publik, në ndërhyrjen e saj theksoi mungesën e organizmeve sindikale nga ana e gazetarëve, por kjo shkon bashkë me një organizmim të dobët që kanë sindikatat në Shqipëri. Modeli i ri i mediave nuk të jep hapësirë për pavarësi editoriale dhe për këtë duhet të ndërhyehet në ligjet që kanë lidhje direkt me punën e gazetarëve, në të njëjtëm kohë duke forcuar rolin edhe rolin e Inspektoriatit të Punës.

Z. Claus Neukirch, Shefi i Zyrës së Këshillit të Europës në Tiranë, përmendi se produkti mediatik është puna e gazetarëve. Puna e tyre është në mënyrë të paevitueshme e ndikuar nga kushtet e punës. Ai nënvizoi se institucionet shtetërore dhe aktorët mediatike kanë për detyrë sigurimi e këtyre kushteve minimale për të pasur më pas një media më të shëndetshme, të pavarur dhe të lirë. Z. Neukirch tha se Këshilli i Evropës do të mbështesë iniciativa të tilla si ajo e AMA-s dhe Komisionit për Edukimin dhe Mjetet e Informimit Publik për të ndryshuar situatën.

Z. Musa Ulqini, anëtar i Komisionit për Edukim dhe Mjetet e Informimit Publik, vuri theksin se kontrata tip dhe ajo kolektive duhet të ishin qëllimi i tavolinës, po ashtu edhe krijimi i një sindikate për të ndjekur modelin italian apo edhe të vendeve të tjera perëndimore duke krijuar edhe urdhërin e gazetarëve. Znj. Eda Beqiri, nga Inspektoriati i Punës, tha se ekziston vetëm një Vendim i Këshillit të Ministrave, duke iu referuar Vendimit nr. 358, datë 25.03.1996, i cili rregullon punën e gazetarit. Ajo ofroi bashkëpunim për përmirësimin praktik të këtij kuadri rregullator. Drejtori i Programeve në AMA, z. Arben Muka, prezantoi treguesit konkretë të burimeve njerëzore të angazhuara, të cilat autoriteti i bën transparent për publikun në versionin print ose online.

Nga ana tjetër, z. Mark, Marku, nga Departamenti i Gazetarisë dhe Komunikimit në UT, tha se Departamenti krijon premisa për gazetarë të mirë, por, ai nuk krijon gazetarët, ata krijohen duke ushtuar profesionin në redaksi, prandaj kushtet e punës janë të rëndësishme për të krijuar gazetarë të mirë dhe për rrjedhojë media cilësore.

Si nga Z. Blendi Salaj, nga Qendra Media Aktive, ashtu edhe nga z. Armand Shkullaku nga Shoqata e Gazetarëve Profesionistë, u ngritën problemet e punës së gazetarëve në punën e tyre të përditshme. Mosshlyerja e pagave në kohë, mungesa e kontratave tip dhe atyre kolektive, mungesa e urdhërit të gazetarit, ndërrimi i shpeshtë i stafit të redaksisë pa arsye të arsyeshme, paga minimale, mungesa e përshkrimeve të punës, oraret e zgjatura tej kushteve njerëzore në punë, janë ndër arsyet praktike dhe të prekshme që pse Shqipëria ka akoma probleme me lirinë e medias dhe integritetin e saj. Këto mendime u përkrahën edhe nga pedagogia e gazetarisë dhe komunikimit, znj. Iris Luarasi si dhe zëvendëskryetari i AMA-s z. Sami Neza.

Gjatë seancës përmbyllëse të këtij takimi, rreth 90 minuta kur Tryeza kishte filluar nga puna, u paraqit për të marrë pjesë dhe z. Aleksandë Çipa, Kryetari i Unionit të Gazetarëve në Shqipëri, i cili pasi u njoh me agjendën refuzoi të merrte pjesë në diskutim, duke braktisur takimin, me arsyetimin, siç tha ai, “që nuk i figuronte emri në agjendën e eventit”. Por nga organizatorët u sqarua se kishte një komunikim zyrtar mes AMA-s dhe Unionit, ku ishin ndjekur të gjitha procedurat për pjesmarrje dhe angazhim në axhendë. Por nga Unioni një herë ishte konfirmuar pjesmarrja dhe një herë tjetër, po me shkrim, ishte anuluar pjesëmarrja.

Në përfundim  të tryezës u ra dakord se brenda muajit maj 2018 AMA do të pasqyronte në një material të përmbledhur të gjitha propozimeve dhe sugjerimeve konkrete të Tryezës, në mënyrë që ato të adresohen për shqyrtim dhe rrugëzgjidhje në institucionet përkatëse.

Autoriteti i Mediave Audioviozive                                                  

Tiranë, më 11.05.2018

AMA dënon dhunën ndaj gazetarëve dhe medias

AMA dënon dhunën ndaj gazetarëve dhe medias

Autoriteti i Mediave Audiovizive, AMA dënon me forcë dhunën ndaj gazetarit dhe drejtuesit të Televizonit “Zjarr TV” Ismet Drishti.

AMA u kërkon autoriteteve përkatëse që të kryhet një hetim i thelluar për gjetjen e autorëve të ushtrimit të dhunës, që ka sjellë  dëmtimin fizik  të Z. Drishti, por dhe që  përbën  alarm për lirinë e medias në Shqipëri.

Ky është sulmi i dytë që kryhet ndaj “Zjarr TV”  dhe drejtuesit të saj. Pak ditë më parë u dhunuan ambientet e këtij  televizioni dhe pajisje të shumta u dëmtuan ose u vodhën nga persona ende të pazbuluar nga policia.

AMA apelon fuqishëm ndaj autoriteteve përgjegjëse të sigurisë në vend që të bëjnë të gjitha përpjekjet që ata që kanë ushtruar dhunë ndaj gazetarit Ismet Drishti të përballen me ligjin, si një garanci për krijimin e  një mjedisi më të sigurtë për lirinë e medias dhe për të gjithë gazetarët.

 

Autoriteti i Mediave Audiovizive

Tiranë, më 07.04.2018

Autoriteti i Mediave Audiovizive pret në vizitë zyrtare Autoritetin Maqedonas të Mediave

AUTORITETI I MEDIAVE AUDIOVIZIVE PRET NË VIZITË ZYRTARE AUTORITETIN MAQEDONAS TË MEDIAVE

IMG_8697

IMG_8701

IMG_8715

Autoriteti i Mediave Audiovizive priti sot në ambientet e tij vizitën e delegacionit maqedonas të Agjencisë së Medias për Shërbimet Audio dhe Audiovizive.

Kryetari i Autoritetit, Z. Gentian Sala, dhe stafi i tij mirëpritën Z. Lazo Petrusevski, President i Këshillit të Agjencisë, Z. Milaim Fetai, Zëvendës president i Agjencisë, Z. Arben Saiti Shef i Departamentit të Mbështetjes së Informacionit dhe Çështjeve të Përgjithshme, Z. Agron Ademi, Koordinator i zyrës për Marrëdhëniet me Publikun.

Në takim u diskutuan çështje me rëndësi për të dy Autoritetet, si : shkëmbimi i ndërsjellët mes dy Autoriteteve, trendet e zhvillimit të medias, risitë e teknologjisë në rajon dhe më gjerë, kuadri rregullator në funksion të matjes së audiencës, gjithashtu edhe u shkëmbyen përvojat në lidhje me procesin e digjitalizimit të transmetimeve.

Autoriteti Maqedonas ndau eksperiencën e tij në fushën e programacionit, mënyrat e monitorimit dhe sfidat si të teknologjisë ashtu edhe të burimeve njerëzore në lidhje me programacionin.

Procesi i digjitalizimit në Maqedoni është kryer në një periudhë kohore katër vjeçare dhe procesi tanimë është mbyllur me sukses.

Z. Sala e njohu delegacionin me proceset që AMA është duke punuar.  Digjitalizimi është duke vazhduar me sukses dhe pritet që të arrihen afatet e parashikuara.

Një pikë tjetër e diskutimeve mes dy përfaqësive ishte edhe bashkëpunimi për kuadrin rregullator të transmetimeve.

Z. Lazo Petrusevski, Presidenti i Këshillit të Agjencisë, u tregua i gatshëm të forcojë bashkëpunimin midis autoriteteve, do të ketë edhe shkëmbim studimesh të realizuara përkatësisht nga secili.

Shumë shpejt ky takim i parë në Tiranë do të vazhdojë edhe më tej me hapa konkret, dhe një memorandum bashkëpunimi pritet të firmoset muajt në vijim.

Autoriteti i Mediave Audiovizive

Tiranë, më 30.03.2018

 

 

AUTORITETI I MEDIAVE AUDIOVIZIVE NJOFTON MBYLLJEN E TRANSMETIMEVE ANALOGE NË  QARQET TIRANË DHE DURRËS

Autoriteti i Mediave Audiovizive (AMA) njofton se data përfundimtare e mbylljes së transmetimeve analoge në qarkun Tiranë dhe qarkun Durrës është 31 Korrik 2018. Teleshikuesit që ndjekin transmetime televizive përmes teknologjisë analoge, duhet të pajisen me dekoder digjital tokësor të tipit DVB-T2- Universal ose të jenë të pajisur me aparat televizori që ka të inkorporuar dekoderin e këtij tipi. Në kushte të tjera, mbas datës 31 Korrik 2018 nuk do të mund të shihen më transmetime televizive në qarqet Tiranë dhe Durrës. Për informacione të mëtejshme, na kontaktoni në numrin 04 410 44 55 ose 04 410 44 56”.

 

Autoriteti i Mediave Audiovizive

 

 

Njoftim “Për çeljen e garës për dhënien e 16 licencave të transmetimit audio analoge private”

NJOFTIM “PËR ÇELJEN E GARËS PËR DHËNIEN E 16 LICENCAVE TË TRANSMETIMIT AUDIO ANALOGE PRIVATE”

Autoriteti i Mediave Audiovizive (AMA), në mbështetje të ligjit nr. 97/2013 “Për mediat audiovizive në Republikën e Shqipërisë”, i ndryshuar, rregullores “Rregullores “Për procedurat dhe kriteret për dhënien e licencës së transmetimit audio”, miratuar me vendimin nr. 153, datë 18.07.2016 të AMA-s, i ndryshuar, si dhe vendimit nr. 29, datë 21.02.2018 të AMA-s “Për çeljen e garës për dhënien e 16 licencave të transmetimit audio analoge private” do të organizojë procedurën e përzgjedhjes së kandidaturave për dhënien e 16 licencave private të transmetimit audio analoge, të përbërë nga:

  1. licenca e shërbimit të programi audio;
  2. licencë për ndërtimin e operimin e rrjetit analog.

Për zonat e mëposhtme:

 

Nr. Zona e ofrimit tӫ shӫrbimit Pӫrcaktimi i operatorit Pika
transmetuese
Frekuenca
(MHz)
 

1

Qarqet Tiranӫ dhe Durrӫs  

Audio rajonale analoge

Fushӫ Dajt 98.2
Krujӫ 90.9
2 Qarqet Tiranӫ dhe Durrӫs  

Audio rajonale analoge

Fushӫ Dajt 92.6
Krujӫ 94.7
3

 

 

 

Qarku Vlorӫ

 

 

 

Audio lokale analoge

 

 

Zvërnec 90.6
Treblovë 92.5
Himarë 89.5
Llogora 95.3
Mile 89.6
4

 

 

 

Qarku Vlorӫ

 

 

 

Audio lokale analoge Zvërnec 88.6
Treblovë 96.3
Himarë 89.8
Llogora 96
Mile 90.9
5 Qarku Lezhӫ Audio lokale analoge Tyrbe Lezhë 92.5
Rrëshen 93.1
6 Bashkia Dibӫr Audio lokale analoge Homesh (Peshkopi ) 89.2
7 Bashkia Mat Audio lokale analoge Mat 87.7
8 Bashkia Bulqizӫ Audio lokale analoge Bulqizӫ 90
9 Bashkia Klos Audio lokale analoge Klos 90.7
10 Bashkia Pӫrmet Audio lokale analoge Pӫrmet 89.2
11 Bashkia Kӫlcyrӫ Audio lokale analoge Kӫlcyrӫ 89.5
12 Bashkia Tepelenӫ Audio lokale analoge Tepelenӫ 91.7
13 Bashkia Memaliaj Audio lokale analoge Memaliaj 92.3
14 Bashkia Kukӫs Audio lokale analoge Qafӫ Prush/Kukӫs 89.4
15 Bashkia Has Audio lokale analoge Has 89.7
16 Bashkia Tropojӫ Audio lokale analoge Bajram Curri 90.8

 

Subjektet e interesuara për t’u pajisur me licencë private të transmetimit audio analoge, janë të lutur që të depozitojnë aplikimet në Autoritetin e Mediave Audiovizive, rruga “Papa Gjon Pali II”, Nr. 15, Kutia Postare 1010, Tiranë, brenda datës 13.04.2018  ora 10.00.

 Dokumentacioni i plotë i konkurrimit të kandidaturave, që përfshin:

  • Rregulloren “Për procedurat dhe kriteret për dhënien e licencës së transmetimit audio” e ndryshuar;
  • Kushtet teknike të instalimit të pajisjeve transmetuese për secilën zonë të shpallur; (Pika e transmetimit, kanali, fuqia e transmetuesit);
  • Kërkesat programore;
  • Pagesat për licencën, taksat etj, të llogaritura për zonën në fjalë;

 mund të tërhiqet në zyrën e Arkivë-Protokollit, në AMA pas kryerjes së pagesës në Drejtorinë e Shërbimeve të Brendshme, nga çdo subjekt që synon të marrë pjesë në konkurrim.

 Aplikimet do të hapen në datën 13.04.2018, ora 10.00, në mjediset e AMA-s, ku subjektet aplikues apo përfaqësuesit e autorizuar prej tyre, kanë të drejtë të jenë të pranishëm në momentin e hapjes së dosjeve të aplikimit.

Njoftim për çeljen e procedurës të dhënies së 1 licence të transmetimit audio të komunitetit

NJOFTIM PËR ÇELJEN E PROCEDURËS TË DHËNIES SË 1 LICENCE TË TRANSMETIMIT AUDIO TË KOMUNITETIT

Autoriteti i Mediave Audiovizive (AMA), në mbështetje të ligjit nr. 97/2013 “Për mediat audiovizive në Republikën e Shqipërisë”, i ndryshuar, rregullores “Për dhënien e licencave të transmetimit audio të komunitetit” miratuar me vendimin nr. 55, datë 04.04.2016 të AMA-s, si dhe vendimit nr. 28, datë 21.02.2018 të AMA-s “Për përcaktimin e frekuencave për shërbimin e transmetimit audio të komunitetit dhe çeljen e garës për dhënien e licencës të transmetimit audio të komunitetit”, do të organizojë procedurën e përzgjedhjes së kandidaturave për dhënien e 1 licence të transmetimit audio të komunitetit, për zonat e mëposhtme:

 

Nr. Zona e ofrimit të shërbimit Përcaktimi i operatorit Pika
transmetuese
Frekuenca
(MHz)
 1

 

 

 

 

 

Qarqet Elbasan, Fier, Korçë  

Audio Komuniteti

 

 

Petresh 93.4
Librazhd 89.3
Gramsh 89
Prrenjas 89.9
Çervenakë 90.6
Çardhak 88.7
Ersekë 87.7
Ardenicë 98.7
Ligovun 96.8
Ballsh 88.1

 

Subjektet e interesuara për t’u pajisur me licencë private tӫ transmetimit audio tӫ komunitetit, janë të lutur që të depozitojnë aplikimet në Autoritetin e Mediave Audiovizive, rruga “Papa Gjon Pali II”, Nr. 15, Kutia Postare 1010, Tiranë, brenda datës 03.04.2018  ora 10.00.

Dokumentacioni i plotë i konkurrimit të kandidaturave, që përfshin:

  • Rregulloren “Për dhënien e licencave të transmetimit audio të komunitetit”;
  • Karakteristikat teknike të transmetimit.

 mund të tërhiqet në zyrën e Arkivë-Protokollit, në AMA, nga çdo subjekt që synon të marrë pjesë në konkurrim.

 Aplikimet do të hapen më datë 03.04.2018, ora 10.00, në mjediset e AMA-s ku aplikuesit apo përfaqësuesit e autorizuar prej tyre, kanë të drejtë të jenë të pranishëm në momentin e hapjes së dosjeve të aplikimit.

Njoftim “E drejta e transmetimit audioviziv të dy eventeve sportive ndërkombëtare për vitin 2018”

E drejta e transmetimit audioviziv të dy eventeve sportive ndërkombëtare për vitin 2018

Autoriteti i Mediave Audiovizive, në zbatim të ligjit nr. 97/2013 “Për mediat  audiovizive në Republikën e Shqipërisë”, i ndryshuar dhe akteve të miratuara në dhe për zbatim të tij, njofton të gjithë subjektet ofrues të shërbimeve mediatike audiovizive se Radio Televizioni Shqiptar (RTSH) është mbajtësi i vetëm i të drejtave ekskluzive të transmetimit për territorin e Republikës së Shqipërisë të eventeve sportive “Lojërat Olimpike Dimërore Peyong Chang 2018” dhe “Kampionati Botëror i futbollit, FIFA World Cup Rusi 2018”.

Për sa më sipër, sjellim në vëmendjen tuaj se transmetimi i këtyre eventeve dhe/ose sekuencave të tyre, gjatë programit tuaj, duhet të bëhet vetëm pasi të jetë nënshkruar, më parë, një kontratë, ose marrëveshje me mbajtësin e të drejtave përkatëse të transmetimit.

AMA bën me dije se do të monitorojë vazhdimisht të gjitha transmetimet audiovizive dhe, në rast të mosrespektimit të parashikimeve përkatëse për të drejtat e transmetimit të këtyre eventeve, do të procedojë sipas të gjitha përcaktimeve ligjore dhe atyre nënligjore në fuqi.

Autoriteti i Mediave Audiovizive

Tiranë më 21.02.2018

Autoriteti i Mediave Audiovizive organizon takimin e parë konsultues për matjen e audiences në Shqipëri

Autoriteti i Mediave Audiovizive organizon takimin e parë konsultues për matjen e audiences në Shqipëri

FullSizeRender (2) FullSizeRender (1)

Me zhvillimin e industrisë televizive gjatë viteve, funksioni i Hulumtimit të Audiencës ka shërbyer për të ndihmuar industrinë e transmetimit dhe reklamimit që të zhvillohet dhe rritet përmes informacionit dhe gjetjeve përsa i përket sjelljes së audiencës në përzgjedhjen dhe programacionit televiziv, si edhe treguesve sa i përket tregëtisë së kohës televizive në funksion të industrisë së reklamave.

Me qëllimin që ky treg të jetë sa më transparent AMA organizoi takimin e parë konsultativ për rregullimin e audiencës. Në fokus të aktivitetit rregullator të AMA-s, matja e audiencës televizive, është një aspekt mjaft i rëndësishëm për rregullimin e tregut audioviziv dhe bën pjesë në grupin e veprimtarive që AMA organizon, mbështet dhe promovon në përputhje me dispozitat ligjore të ligjit 97/2013 “Për mediat Audio dhe Audiovizive në Republikën e Shqipërisë”, nenet 19 (pika 2 germa c) dhe 23 (pika 1 gërma ç).

Në tryezën e organizuar nga Autoriteti i Mediave ishin të ftuar të gjitha palët e interesit, televizionet kombëtare dhe rajonale, shoqatat dhe agjencitë e komunikimit, kompanitë e reklamave, dhe kompanitë që masin audiencën.

Nisma e marrë nga AMA u përshëndet nga të gjitha palët e ftuara. Ata e cilësuan këtë hap të nevojshëm dhe rregullimin e tregut të matjes së Audiencës të domosdoshëm.

Z. Carlo Bollino, nga Report TV, u shpreh se është koha që në Shqipëri të ketë një kompani e cila të jetë e certifikuar dhe të ketë besimin e të gjitha palëve në integritetin e saj. Z. Theodhori Çami nga kompania Le Spot, tha se do të jetë me vend dhe e domosdoshme edhe një konsulencë e huaj në lidhje me draftimin dhe propozimeve të specializuara sipas nevojave të tregut. Ndërsa Znj. Alma Mera, Drejroreshë Marketingu në Top Channel nënvizoi se tregu ka nevojë për një matje profesionale të audiencës të pranuar nga të gjithë, sepse kështu rregullohet tregu i reklamave.

Qendrimi i Shoqatës së Agjencive të Komunikimit ishte se duhet të ketë më shumë transparencë e të ndërtohet një sistem që të përfaqësojë të gjitha palët. Tregu duhet të vetë rregullohet por atij natyrisht që duhet t’i vendosin standarde. Pra, media eshte dakord që shteti duhet të supervizojë por të mos përfshihet. Fryma që mbizotëroi nga të pranishmit ishte ajo e një kërkese për krijimin e një standardi të ri edhe të besueshëm.

Kryetari i AMA-s i njoftoi të pranishmit se së shpejti do të ketë një takim të dytë i cili do të paraqesë propozime konkrete. Po ashtu të gjithë të pranishmit do të mbahen të informuar nga Autoriteti në lidhje me mbledhjen e parë konsultative dhe mbledhjet e tjera që do të vijojnë.

Në takim ishin përfaqësues nga organizmat ndërkombëtarë me seli në Tiranë. Në këtë nismë rol të rëndësishëm për një procës sa më të besueshëm ka luajtur edhe KiE, i cili është njëkohësisht edhe partneri kryesor ndërkombëtar i AMA-s.

Autoriteti i Mediave Audiovizive

Tiranë, më 20.02.2018

Autoriteti i Mediave Audiovizive organizon tryezën e diskutimit: Transmetimi i reklamave dhe komunikimeve tregetare – dukuri dhe qasje ligjore ne tregun audioviziv

Autoriteti i Mediave Audiovizive organizon tryezën e diskutimit: Transmetimi i reklamave dhe komunikimeve tregetare – dukuri dhe qasje ligjore ne tregun audioviziv

Autoriteti i Mediave Audiovizive organizoi, të enjten, datë 16 mars tryezën e diskutimit me temë: Transmetimi i reklamave dhe komunikimeve tregetare – dukuri dhe qasje ligjore ne tregun audioviziv. Kjo tryezë diskutimi vjen pas një sërë hapash që AMA ka ndërmarrë në zbatimin e plotë të ligjit dhe rolit të saj në hapësirën audiovizive.

Hapësira e reklamave dhe komunikimeve tregtare ka qenë dhe mbetet një ndër fokuset kryesore të AMA-s për të nxitur subjektet audiovizive në respektimin e kuadrit ligjor në fuqi, në shërbim të informimit dhe orientimit sa më të mirë të publikut. Problematikën që haset në këtë aspekt, Autoriteti e ka bërë prezent në komunikimet shkresore dhe të drejtpërdrejta me OSHMA-të.

Kryetari i Autoritetit të Mediave Audiovizive gjatë kësaj tryeze Z. Gentian Sala tha se ky takim është vazhdë e filozofisë së AMA-s për partneritet me OSHMA-të, si një zgjedhje që forcon zbatueshmërinë e kuadrit legjislativ, që ndikon drejtpërdrejt në aktivitetin dhe performancën e vetë subjekteve audio dhe audiovizive, që ka efekte dhe impakt pozitiv tek publiku.

Drejtori i Programeve në AMA, Z. Arben Muka tha se nga fundi i vitit 2015 dhe gjatë vitit 2016-të dhe në vijim aspekti i emetimit të reklamave dhe komunikimeve tregtare nga OSHMA-të është në listën e prioriteteve për Autoritetin.

Në këtë takim ishin të ftuar aktorë të cilët kanë rol thelbësor në përmbushjen dhe bashkërendimin e forcave për rregullimin e tregut të reklamave: Agjencia Shtetërore për Mbrojtjen e të Drejtave të Fëmijëve, ku Znj. Ina Verzivolli foli për “Reklamat dhe mbrojtjen e të miturve, përmirësimet ligjore në këtë aspekt”, Urdhri i Mjekëve të Shqipërisë, ku Z. Fatmir Brahimaj foli për “Promocionin audioviziv për shëndetin dhe respektimin e Kodit të etikës dhe deontologjinë mjekësore”, nga Urdhri i Farmacistëve të Shqipërisë, Znj. Diana Toma foli për “Rekomandimet për barnat përmes transmetimeve audiovizive”.

Z. Brahimaj, President i Urdhrit të Mjekut, theksoi se ai është i vendosur që të bashkëpunojë për vendosjen e besimit pacient-mjek, sigurimin e cilësisë së kujdesit shëndetësor, ruajtjen me ndërshmëri të profesionit mjekësor dhe parandalimin e ushtrimit të tij në mënyrë të pandershme.

Znj. Toma, Presidente e Urdhrit të Farmacistëve tha se ka angazhim të plotë nga ana e këtij urdhri që të ketë rigorozitet në zbatim të të gjitha rregullimeve në përmbushjen e etikës.

Znj. Ina Verzivolli, tha se është e angazhur që të rrisin rolin promovues të të drejtave të fëmijëve në media.

Ky takim ishte një rast shumë i mirë për prezantimin e gjetjeve dhe dukurive të evidentuara gjatë monitorimeve të përmbajtjeve të emetuara nga subjektet audiovizive: mënyrat e menaxhimit të hapësirës promocionale dhe impakti tek audienca; reklamat dhe mbrojtja e fëmijëve; promocioni audioviziv për shëndetin dhe rekomandimi për barnat përmes transmetimeve audiovizive etj.

Në tryezë merrnin pjesë: përfaqësues nga Instituti i Medias, Departamenti i Gazetarisë, OSHMA-të lokale dhe kombëtare, organizatat dhe partnerët ndërkombëtar në vend. Kjo tryezë e parë me ketë fokus do të pasohet nga tryeza të tjera të cilat do të dalin me rekomandime dhe masa më konkrete.

Autoriteti i Mediave Audiovizive

Tiranë, më 16 Mars 2017

Autoriteti i Mediave Audiovizive në bashkëpunim me MIAP organizojnë konfererencën “Media e gjeneratës tjetër”

Autoriteti i Mediave Audiovizive në bashkëpunim me MIAP organizojnë konfererencën “Media e Gjeneratës Tjetër”

Më datë 20 Maj, Autoriteti i Mediave Audiovizive në bashkëpunim me Ministrinë e Inovacionit dhe Administratës Publike në kuadër të Javës së Inovacionit organizuan konferencën “Media e gjeneratës tjetër”. Në aktivitet u prezantuan risitë e fundit nga bota teknologjike dhe inovacionit të aplikuara në Shqipëri në infrastruktura të ndryshme të transmetimit numerik si ato tokësore, satelitore, CaTv, IPTV, etj. Në këtë etapë të re të digjitalizimit që po hyn Shqipëria mediat pritet të kenë rolin e tyre më me përkushtim sa i përket garantimit të parimeve bazë të demokracisë dhe në promovimin e lirisë së shprehjes, pluralizmit, diversitetit etnik dhe kulturor si dhe pavarësin në politikat editoriale të saj.

Konferencën me titullin “Media e gjeneratës tjetër” e hapi me fjalën e saj përshendetëse Ministrja e Shtetit për Inovacionin dhe Administratën Publike, znj. Milena Harito. Ajo solli një përshkrim të shkurtër mbi procesin e digjitalizmit që po kalon vendi, duke e cilësuar atë si një dukuri komplekse që mund të realizohet vetëm në një bashkëpunim të frytshëm mes shumë aktorëve. Zj. Harito theksoi se deri tani ky proces në Shqipëri ka ecur në rrugën e duhur falë këtij bashkëpunimi dhe sot vendi gjendet në një fazë të avancuar të tij. Në vijim, Ministrja e Shtetit për Inovacionin dhe Administratën e përqëndroi fjalën e saj duke thënë se ky ndryshim i ri teknologjik pritet të sjellë një peizazh mediatik të ndryshuar, të ridimensionojë mënyrën e të parit të TV dhe mbi të gjitha pritet të ndikojë në zhvillimin e ekonomisë së vendit.

Ndërsa në fjalën e tij, Kryetari i Autoritetit dhe Mediave Audiovizive, z. Gentian Sala theksoi se fokusi i Autoritetit që ai drejton ka qenë dhe mbetet maksimizimi i ofertës për publikun. Për qytetarët sipas kreut të këtij institucioni, ngjall më shumë interes buqeta e programeve që platformat dhe kanalet ofrojnë, se sa parametrat e teknikës dhe teknologjisë. Me fokusin tek Transmetuesi Publik, Z. Sala shpjegoi se AMA mbetet e investuar tek shumëfishimi dhe cilësia e programeve, në mënyrë që ato të destinohen për të gjitha grupmoshat, por dhe të jenë të shumëllojshme.

“Ne kemi besim se dialogu dhe komunikimi mes dy institucioneve tashmë do të jetë edhe më intensiv me zgjedhjen e menaxhmentit të ri të RTSH-së, për të mbërritur tek objektivi ynë i përbashkët, nënshkrimi i Kontratës së Shërbimit Publik” – përfundoi z. Sala fjalën e tij.

Drejtori i ri i Radio Televizionit Shqiptar, gjatë fjalës së tij e vuri theksin mbi gjendjen e gazetarisë sot, 25 vjet që nga koha kur ai kish qenë vetë gazetar. Duke i dhënë rëndësi ruajtjes së dinjitetit dhe personalitetit të gazetarit ai dha shpjegime mbi atë cfarë mediat duhet të ofrojnë lidhur me atë cfarë publiku dëshiron të ndjekë. Radio Televizioni Shqiptar për Z. Gëllçi është një mekanizëm shoqëror që duhet t’u paraprijë ndryshimeve të mira në shoqëri dhe teknologjia është vetëm një mjet në shërbim të këtij qëllimi.

Konferencën e përshëndeti dhe Z. Erkan Tabak, Drejtori i Përgjithshëm i Albtelekom, ku dha një pasqyrë të plotë të investimeve të kryera nga kjo shoqëri në fushën e teknologjisë dhe medias.

Operatorët kryesorë në fushën e transmetimeve audiovizive paraqitën një panoramë të investimeve të kryera gjatë viteve të fundit në teknologjinë audio dhe audiovizive në vend. Kjo, si në infrastrukturën transmetuese ashtu edhe në ofrimin e shërbimeve programore. Gjatë këtyre prezantimeve u trajtuan dhe argumente të cilat lidhen me sfidat dhe angazhimet me të cilat përballet tregu audioviziv në kuadër të zhvillimeve të reja në teknologjinë e transmetimeve audiovizive dhe të telekomunikacionit.

Në konferencë ishin të ftuar, gazetarë, subjekte audioviozive, organizatat ndërkombëtare, studiues të medias, shoqëri të telekomunikacionit si dhe gjithë grupet e interesit mbi median dhe teknologjinë.

Autoriteti i Mediave Audiovizive

Tiranë, më 20 maj 2016

Komunikimi me publikun, konferenca, takime

Konferenca ndërkombëtare shkencore: “Digjitalizimi i transmetimeve tokësore: sfida, paradokse, shpresa” 

Të mërkurën, më datë 25 nëntor, në Hotel Sheraton u organizua konferenca “Digjitalizimi i transmetimeve tokësore: sfida, paradokse, shpresa”.Kjo konferencë vjen si bashkëpunim i departamentit të Gazetarisë dhe Komunikimit në Universitetin e Tiranës dhe Autoritetit të Mediave Audiovizive.

më shumë