+355 67 303 3000 info@ama.gov.al

Deklarata

Organizohet forumi i parë i diskutimit për ndryshimet në ligjin e AMA-s dhe AKEP-it

Sot, në datën 17 dhjetor 2018, Autoriteti i Mediave Audiovizive (AMA) dhe Autoriteti i Komunikimeve Elektronike dhe Postare (AKEP), organizuan forumin e parë të diskutimit mbi ndryshimet në ligjin nr. 97/2013 “Për mediat audiovizive në Republikën e Shqipërisë”, i ndryshuar” dhe në ligjin nr. 9918, datë 19.5.2008 “Për komunikimet elektronike në Republikën e Shqipërisë”, i ndryshuar.

Këto projektligje synojnë krijimin e një kornize ligjore për rregullimin e përmbajtjes së informacionit që ofrohet online nga ofruesit e shërbimeve të publikimeve elektronike, me qëllim garantimin e së drejtës së informimit, të drejtës së përgjigjes si dhe mbrojtjen e dinjitetit dhe të drejtave dhe lirive themelore të njeriut. Duke qenë se mediat online po zënë vend gjithnjë edhe më shumë në hapësirën mediatike shqiptare ka lindur e udhës që veprimtaria e tyre të rregullohet edhe nga ana ligjore.

Në takim ishin të ftuar përfaqësues të mediave elektronike, eskpertë dhe juristë nga Ministria e Drejtësisë, Këshilli i Ministrave si dhe institucioneve të tjera publike, përfaqësues të organizmave ndërkombëtare si dhe të shoqatave që në fokus të punës së tyre kanë median.

Gazetarët dhe përfaqësuesit e mediave të pranishme, në tërësi u shprehën skeptikë për amendimet e propozuara. Mendimet e tyre u ndanë në tre shtylla kryesore: e para i shihte ndryshimet tërësisht antikushtetuese dhe në shkelje flagrante të lirise së medias; e dyta që kishte mendimin se ligji ishte me vend të amendohej në disa pika por kjo nuk duhet të cënojë lirinë e shprehjes por vetëm të merrte masa ndaj fenomenit fake news dhe e fundit, që i konsideron amendimet jo efektive, pasi abuzuesit do të përdorin teknologji të reja, apo rrjetet sociale për t’u shprehur.

Në ditet në vijim, AMA do të përgatisë nje material me të gjitha çështjet e ngritura gjatë takimit sot, i cili do t’i përcillet të gjithë pjesëmarrësve si dhe do të bëj publik kalendarin e takimeve të radhës për diskutimet në lidhje me projektligjet.

 

Autoriteti i Mediave Audiovizive                                        

17.12.2018

Përmirësimi i raportimit gjatë fushatës për zgjedhjet vendore

Autoriteti i Mediave Audiovizive (AMA) në bashkëpunim me Fondacionin Konrad Adenauer (KAS) dhe Departamentin e Gazetaris dhe Komunikimit në Universitetin e Tiranës, ditën e mërkurë, datë 12 Dhjetor 2018, prezantuan fillimin e projektit “ZGJEDHJET LOKALE DHE MEDIA”.

Në prag të zgjedhjeve vendore në qershor të vitit 2019, të tre partnerët angazhohen se do të organizojnë disa aktivitete trajnimi për përmirësimin e raportimit gjatë fushatës për zgjedhjet vendore me gazetarë lokalë në qarqe të ndryshme të vendit. Synimi është rritja e cilësisë së mbulimit të procesit zgjedhor, ku gazetarët do të kenë mundësi të përvetësojnë njohuri dhe të shkëmbejnë eksperienca se si të përmbushin funksionin e tyre në bazë të parimit: Gazetari nuk duhet t’i mësojë votuesit se për kë të votojnë, por t’u tregojë se për cfarë votojnë.

Në fjalën e mirëseardhjes Kryetari i AMA-s, z. Gentian Sala falenderoi fondacionin gjerman për mbështetjen dhe përshëndeti bashkëpunimin me Departamentin e Gazetarisë dhe Komunikimit në UT. Z. Sala veçoi se cilësia e raportimit të ngjarjeve dhe sidomos të zgjedhjeve mbetet një ndër faktorët matës të demokracisë.

Drejtori i zyrës për Shqipërinë i KAS, z. Walter Glos, vuri theksin në rëndësinë e ngritjes së një demokracie të qendrueshme dhe të shpërndarë për të gjithë qytetarët. Ai tha se KAS po ndihmon me gjithë mjetet që ka për forcimin e demokracisë në vend “Gazetarët lokalë janë një instrument për të kuptuar më mirë dinamikat e vendit”.

Z. Mark Marku, shef i Departamentit të Gazetarisë dhe Komunikimit në UT e vlerësoi projektin dhe u shpreh optimist për arritjet e tij. Po ashtu ai përmendi edhe bashkëpunimet e deritanishme me AMA-n dhe vlerësoi se me ndihmën e secilit nga këto bashkëpunime ka ndikuar tek cilësia e gazetarisë, gazetarëve, studentëve dhe e raportimit të lajmit.

 

Autoriteti i Mediave Audiovizive

Tiranë, më 12 dhjetor 2018

Gazetarët dhe përmbajtjet mediatike që ata përgatisin nuk mund të sulmohen dhe anatemohen me qëndrime ekstremiste

Autoriteti i Mediave Audiovizive, AMA, u njoh me një deklaratë të djeshme për median lëshuar nga organizata OMONIA, dega Sarandë, si reagim ndaj dëmtimit të një pllake përkujtimore dedikuar një figure që përshkruhet si “luftëtar i minoritetit etnik grek”.

Ajo që bie në sy në deklaratën e OMONIA-s, në të cilën kërkohet dhe reagimi i Autoritetit të Medias, është fajësimi për këtë akt i medias dhe sulmi ndaj saj, konkretisht rreth një përmbajtjeje me sfond historik që është transmetuar së fundmi në televizionin Top Channel nga gazetari Marin Mema. Gazetarët dhe përmbajtjet mediatike që ata përgatisin nuk mund të sulmohen dhe anatemohen me qëndrime ekstremiste, me mjete dhe shantazhe politike.

Kjo është kundërproduktive. Aq më tepër, kur emisioni në fjalë nuk përmban gjuhë urrejtje apo diskriminimi, por prezanton me dokumente historikë të dhëna mbi ngjarje dhe personazhe të caktuara.

Përballja me faktet dhe opinionet e gazetarëve nuk mund të bëhen me frymë armiqësore ndaj tyre, duke miksuar problematikën e rendit publik me nevojën e lirisë së fjalës dhe të shprehjes. Nuk mund të bëhet as duke bërë vlerësime politike a dogmatike, jashtë kontekstit dhe me ngarkesa të së shkuarës e të sotmes, si nxitje për sulme dhe kufizime të misionit dhe të pavarësisë së medias, dimensione bazike për çdo institucion dhe shoqëri demokratike.

Qëndrimi i OMONIA-s përligj hapur rastin absurd të vijimit të shpalljes “non grata” nga autoritetet e shtetit fqinj të gazetarit Marin Mema, vetëm se ai publikoi në televizionin ku punon një reportazh mbi shqiptarët në Greqi, bazuar në të dhëna dhe dokumente të hulumtuara.

Ndaj dhe na duket i pavend, i papërshtatshëm dhe në pozita ekstremiste qëndrimi publik i OMONIA-s kundër medias audiovizive dhe gazetarëve.

AMA vijon të mbetet e angazhuar për parandalimin dhe evitimin e gjuhës së urrejtjes dhe të diskriminimit të çdo lloji në transmetimet audio dhe audiovizive, që nxisin armiqësi mes popujve, apo që instrumentalizojnë aspekte që lidhen me trajtimin e pakicave në Shqipëri.

AMA i apelon institucioneve të shtetit shqiptar, në mënyrë të veçantë Ministrisë për Evropën dhe Punët e Jashtme, që të ndikojë me të gjitha instrumentet ligjore dhe institucionale dhe të mbështesë garantimin e lëvizjes së lirë të gazetarëve shqiptarë, në ushtrimin e profesionit, në favor të lirisë së fjalës dhe mendimit të lirë.

 

Autoriteti i Mediave Audiovizive

 5 Dhjetor 2018

AMA organizon tryezën e diskutimit “Gjuha e urrejtjes në mediat audiovizive”

Autoriteti i Mediave Audiovizive (AMA), dhe Këshilli i Ankesave, organizuan ditën e mërkurën, datë 14.11.2018, Tryezën e Rrumbullakët me temë “Gjuha e urrejtjes në mediat audiovizive”.

Qëllimi i kësaj Tryeze ishte skanimi i situatës përmes prezantimeve të studiuesve dhe ekspertëve të fushës, të cilët ndanë pikëpamjet e tyre analitike në lidhje me gjuhën e urrejtjes në mediat audiovizive, temë kjo që ka tërhequr vëmendjen e katedrave të shumta.

Pjesë e kësaj Tryeze ishin pedagogë të Departamentit të Gazetarisë dhe Komunikimit në Universitetin e Tiranës, anëtarë të Komisionit Parlamentar Për Edukimin dhe Mjetet e Informimit Publik, përfaqësues të Agjencisë Shtetërore për të Drejtat dhe Mbrojtjen e Fëmijëve, të televizioneve, organizmave ndërkombëtarë etj.

Kryetari i AMA-s, z. Gentian Sala, në fjalën e tij përshëndetëse, theksoi se “hate speech” është një dukuri për të cilën diskutohet dita-ditës, nën dritën e zhvillimeve teknologjike. “Sot diskutohet për raportin e gjuhës së urrejtjes me ligjin, me ligjet për median, me vetë median, internetin dhe rrjetet e shumta sociale. Ndaj së fundi, Parlamenti Evropian ndryshoi Direktivën mbi Shërbimet e Medias Audiovizive. Një pikë e rëndësishme e kësaj direktive janë shërbimet e shpërndarjes së videove, mediave sociale, videot e krijuara nga vetë përdoruesit, pasi qartësisht ‘kanë ndikim të konsiderueshëm dhe lehtësojnë mundësinë që përdoruesit të formojnë apo ndikojnë në opinionet e përdoruesve të tjerë’, nënvizoi z. Sala.

Kryetari i Këshillit të Ankesave pranë AMA-s, z. Urim Bajrami, pasi shpjegoi arsyet pse u ndërmor kjo iniciativë diskutimi për gjuhën e urrejtjes, theksoi nevojën e bashkëpunimit të të gjithë aktorëve dhe faktorëve të kësaj fushe, me qëllim evidentimin e problematikave, sidomos të atyre që lidhjen me përmbajtjen televizive dhe zbatimin e normave ligjore dhe etike, dhe ofrimin e zgjidhjeve për përmirësimin e situatës.

Duke folur për gjuhën e urrejtjes në baza krahinore dhe etnike në mediat audiovizive, z. Alban Tartari solli në vëmendje faktin se shpesh, politikat redaksionale synojnë shikueshmëri të lartë dhe klikime në faqet e televizioneve në internet, ndaj kjo politikë anon nga lajmet negative dhe amplifikimi i tyre. Sipas tij, borde etike, të certifikuar e të konsoliduar, nevojiten në mënyrë që të parandalojnë këto dukuri, si dhe të marrin masa për shkeljet që mund të ndodhin në mediat audiovizive. Njëherazi, shtoi ai, duhet ndërgjegjësim më i madh i gazetarëve, redaktorëve, regjizorëve dhe gjithë prodhuesve të përmbajtjeve radio-televizive.

Deputetja e Kuvendit të Shqipërisë, anëtare e Komisionit për Edukimin dhe Mjetet e Informimit Publik zj. Almira Xhembulla u shpreh se është gjithnjë kënaqësi të gjendesh mes profesionistësh dhe të bëhesh pjesë e tryezave kaq cilësore të diskutimit. Zj. Xhembulla ia njohu pikat e dobëta të diskutimit edhe punimeve të Kuvendit, ku theksin e vuri në respektimin e etikës nga ana e deputetëve të Parlamentit të Shqipërisë. Ajo vuri në vëmendjen e të gjithëve se problemet e gjuhës së urrejtjes duhet të adresohen menjëherë sa pa u kthyer në fenomen të përditshëm në mediat tona.

Ndërsa z. Erlis Çela solli një këndvështrim tjetër të gjuhës së urrejtjes, teksa parashtroi studimin e tij mbi lajmet e kronikës dhe detajeve që lajme të tilla nxisin stereotipa dhe urrejtje tek audiencat. Për të, pavarësisht hapësirës që zë kronika në informacionin e përcjellë nga mediat audiovizve, më e rëndësishme mbetet fenomeni i gjuhës së përdorur në lajmet e kësaj natyre. “Zhvillimet teknologjike, ashtu siç kanë çuar në sakrifikimin e disa parimeve deontologjike dhe profesionale të profesionit të reporterit, kanë shtuar presionin e nxitur nga konkurrenca për lajmin e minutës së fundit”, nënvizoi Çela.

Zj. Laureta Axhami Zela u fokusua në rolin e gazetarëve në parandalimin e gjuhës së urrejtjes në median audiovizive. Ajo prezantoi edhe gjetjet e një sondazhi të kryer mbi njohuritë që kishin gazetarë dhe redaktorë të mediave audiovizive mbi gjuhën e urrejtjes.

Ndërsa z. Bashkim Gjergji diskutoi mbi natyrën dhe shtrirjen e gjuhës së urrejtjes në ditët tona. Sipas tij, në kushtet kur tradita flet për harmoni fetare në vend, për mbrojtje të hebrenjve gjatë Luftës së Dytë Botërore, për mungesë aktesh agresive e dhune ndaj popujve të tjerë, termi ‘gjuha e urrejtjes në këtë rast nuk përkon me kuptimin që i kanë dhënë shkencat sociale, bazuar në faktet historike dhe përplasjet e shumta nga antikiteti e deri në ditët e sotme.

Më tej, znj. Suela Musta, e fokusoi prezantimin e saj tek stereotipet me bazë gjinore në televizionet lokale si dhe sfidat e përballjes me Kodin e Transmetimit. Duke iu referuar shembujve të sjellë nga Vlora dhe Shkodra, ajo tha se “stereotipet me bazë gjinore përbëjnë ndër cenimet më të shpeshta të etikës së informacionit dhe komunikimit në media, teksa ekrani mban ende supremacinë e informimit dhe edukimit publik”.

Për z. Ramadan Çipuri, një tjetër ekspert i medias, nisur nga realiteti gjithë përfshirës për të gjithë llojet e mediave në ditët e sotme, përmbysja e hierarkisë së dikurshme redaksionale apo edhe format e reja të komunikimit të brendshëm në institucionet mediatike, gjuha e urrejtjes, format dhe përdorimi i saj janë bërë pjesë e pandarë edhe e ofertës televizive, e cila mendohet se ka një kontroll të rreptë para se t’i ofrohet audiencave.

Në fund të kësaj tryeze, Z. Sami Nezaj Zv. Kryetar i AMA-s, bëri përmbledhjen e shkurtër e prezantimeve dhe sugjerimeve.

Autoriteti i Mediave Audiovizive

Tiranë, më 14.11.2018

Autoritetet rregullatore të Shqipërisë dhe Kosovës tregojnë vullnet për forcimin e bashkëpunimit

Një delegacion i nivelit të lartë nga Komisioni i Pavarur i Medias së Kosovës (KPM), drejtuar nga Z. Muja Ferati, Kryetar i KPM-së, Zj. Violeta Hyseni Kelmeni Nënkryetare, Zj. Naile Krasniqi, Drejtoreshën Ekzekutive, dhe Anëtarët Zj. Vlorë Berisha, Zj. Anita Muriqi, Zj. Maja Slavic, Z. Xhemajl Krasniqi, zhvilluan ditën e hënë më 24 shtator 2018 një vizitë pune në Tiranë në Autoritetin e Mediave Audiovive, AMA.

Digjitalizimi i transmetimeve audiovizive, hartimi i procedurave për hartimin dhe miratimin e paketës së akteve nënligjore, zhvillimi i garës për ndarjen e frekuencave për subjektet e interesuara, evidentimi dhe masat kundër emetimit të përmbajtjeve që nuk respektojnë Kodin e Transmetimit, sidomos mbrojtja e fëmijëve etj., ishin disa nga çështjet që u trajtuan në takim.

Kryetari i AMA-s, z. Gentian Sala dhe homologu i tij nga KPM-ja, z. Muja Ferati, si dhe pjestarët e delegacioneve nga dy institucionet rregullatore, parashtruan ato pika të përbashkëta ku bashkëpunimi mund të dinamizohej më shumë.

Pala kosovare ishte e interesuar më shumë për informacion e përvojë mbi procesin e digjitalizimit, ku janë ende në hapat e para të përgatitjeve, duke kërkuar nga AMA ekspertizë ligjore, teknike dhe organizative për kapërcimin e këtij ndryshimi thelbësor në tregun audioviziv të Kosovës.

Z.Sala përsëriti gatishmërinë për të asistuar të gjitha ato procese të cilat ishin të konsoliduara në AMA, duke i bërë të zbatueshme në realitetin e transmetimeve audiovizive të Kosovës.

Mbështetje do të ketë dhe për shqyrtimin e ankesave që bëhen në Kosovë për programet e kanaleve televizive të Shqipërisë, u tha në takim, në favor të garantimit të shumëllojshmërisë dhe cilësisë së produkteve. Gjatë takimit u theksua rëndësia që ka për të dy institucionet, që ankesat që vijnë drejt AMA-s apo KMP-së, nga të gjithë qytetarët, si në Kosovë ashtu edhe në Shqipëri, të trajtohen njësoj nga të dy institucionet.

Buletini Periodik i AMA-s, një botim çdo 6 muaj që publikon AMA prej vitit 2016, ishte një tjetër interes për delegacionin nga Kosova, si një instrument për transparencën e performancës së tregut audioviziv.

Ky takim zyrtar mes rregullatorëve ishte shprehje konkrete për vullnet në forcimin e bashkëpunimit ndërinstitucional, me shkëmbimin e informacionit, të përvojave në praktikat ligjore, teknike, organizative etj.

Autoriteti i Mediave Audiovizive

Tiranë, më 24 shtator 2018

Informacione mbi procesin e digjitalizimit të transmetimeve audiovizive në qarqet e Tiranës dhe Durrësit

Nisur nga pyetjet, telefonatat dhe komentet e shumta ardhur pranë Autoritetit të Mediave Audiovizive (AMA), po ju përsërisim disa informacione mbi procesin e digjitalizimit të transmetimeve në qarkun e Tiranës dhe Durrësit.

  • Me fillimin e transmetimeve digjitale banorët e qarkut të Tiranës dhe Durrësit kanë mundësi të ndjekin 34 kanale pa pagesë të cilat mund të shikohen nga të gjithë dekoderat e tipit DVB-T2;
  • Të gjithë televizorët pavarësisht nga viti i prodhimit apo marka, përshtaten me dekoderat (DVB-T2) që gjenden në shitje;
  • Nga qeveria janë shpërndarë 88 mijë dekodera falas për familjet që janë pjesë e skemës së ndihmës ekonomike.Të gjithë këta dekodera marrin falas, pa pagesë, 34 kanale;
  • Fushata për informimin dhe ndërgjegjësimin e publikut për procesin e digjitalizimit, zhvillohet prej rreth dy viteve, duke u konsideruar fushata me kohëzgjatje më të madhe krahasuar me vendet e tjera të rajonit.
  • Janë realizuar rreth 300 emisione me pjesëmarrjen e specialistëve të AMA-s, por dhe ekspertëve të fushës, shoqëruar me transmetimin periodik të spoteve shpjeguese të dedikuara për fushatën e ndërgjegjësimit dhe informimit në mediat në televizione dhe radio;
  • Teknologjia që po aplikohet DVB-T2 është përcaktuar në Strategjisë Kombëtare për Digjitalizimin në vitin 2012, gjithashtu sanksionuar edhe në Ligjin Nr. 97/2013 “Për mediat audiovizive në Republikën e Shqipërisë”, i ndryshuar;
  • Kostot e kalimit në transmetime numerike për operatorët lokalë do të mbulohen nga shteti gjatë vitit të parë. Kjo sanksionuar me Ligjin Nr. 34/2017 “Për lirimin e frekuencave të Dixhital Dividentit”, i ndryshuar;
  • AMA, në vitin 2015, ka ulur tarifën për operatorët lokalë rajonalë që mbështeten në rrjetin e operatorit publik, nga 5760 euro/muaj që ishte projektuar nga bordi i mëparashëm i AMA-s, në rreth 2150 euro/muaj;
  • AMA, ka fondin e garantuar nga qeveria shqiptare, për fushatën e informimit dhe ndërgjegjësimit të publikut për këtë proces deri në fund të vitit 2018. Ky fond do të përdoret për të ripërshtatur reklamat, në bazë të problematikave të hasura gjatë kalimit të transmetimeve audiovizive në qarkun e Tiranës dhe Durrësit;
  • AMA do të vijojë me fushatën e informimit dhe ndërgjegjësimit të qytetarëve me qëllim që kalimi në transmetimet digjitale në qarkun e Tiranës dhe Durrësit të realizohet me sukses brenda dates 15 Janar 2019.

 

Autoriteti i Mediave Audiovizive                                                                   

13 Shtator 2018

PYETJE TË SHPESHTA MBI DIGJITALIZIMIN

PYETJE TË SHPESHTA

  1. A disponon AMA ndonjë material informues mbi lidhjen e dekoderave DVB-T2 me televizorin dhe informacione të tjera të nevojshme për procesin e digjitalizimit?

Të gjitha këto informacione do t’i gjeni të ilustruara në Broshurën që AMA ka përgatitur që në fillim të procesit, të cilen mund ta gjeni në faqen zyrtare të AMA-s.  link:

http://ama.gov.al/wp-content/uploads/2016/04/Broshura_AMA_Dixhitalizimi.pdf

  1. Pse duhet të pajisem me dekoder të tipit DVB-T2?

Për të aksesuar transmetimet digjitale është e domosdoshme që të pajiseni me një dekoder të jashtëm Universal DVB-T2, ose një televizor i cili të ketë të inkorporuar këtë tip dekoderi. Caktimi i teknologjise DVB-T2 eshte detyrim sipas percaktimeve te Strategjise se digjitalizimit e vitit 2012, dhe e ligjit 97/2013 : ”Per Mediat Auiovizive ne Republiken e Shqiperise”.

  1. Çfarë duhet të bëj në mënyrë që të kem sinjal digjital në televizorin tim?

Për të aksesuar sinjalin digjital duhet të pajiseni me një dekoder të jashtëm Universal DVB-T2 ose një televizor i cili të ketë të inkorporuar këtë tip dekoderi. Në rastin e dekoderit të jashtëm, sigurohuni që lidhja e tij me televizorin dhe antenen të jetë kryer në rregull dhe më pas vendosni televizorin tuaj në kërkim automatik, për të gjetur kanalet digjitale. Nësë dekoderi është i inkorporuar në televizor, mjafton të lidhni televizorin me antenën dhe më pas t’a vendosni në kërkim automatik.

  1. Nëse nuk pajisem me dekoder, çfarë ndodh?

Nëse ju nuk pajiseni me dekoder, apo televizori juaj nuk ka të inkorporuar dekoderin e tipit DVB-T2 atëhere ju nuk do të mund të aksesoni transmetimet digjitale. Sqarojmë se procesi i digjitalizimit do të ndodhë në të gjithë Shqipërinë. Transmetime analoge do të mbyllen dhe do të kalohet në transmetimet digjitale. Procesi është menduar të zhvillohet me faza, qark pas qarku deri në mbylljen e plotë të transmetimeve analoge në të gjithë vendin. Me mbylljen e transmetimeve analoge në qarkun ku ju banoni nuk do të mund të shikoni programe televizive nëse nuk pajiseni me dekoder të tipit DVB-T2.

  1. Cilin dekoder duhet të blej, pasi në treg ka shume lloje?

Markat e prodhimit të dekoderave mund të jenë të ndryshme por e rëndësishme është që tipi i dekoderit të jetë Universal DVB-T2, në mënyrë që të përdorni një dekoder për të gjitha platformat numerike.

  1. çfarë formati dhe rezolucioni duhet ta kem televizorin që të kem mundësi të ndjek transmetimet digjitale?

Për të aksesuar transmetimet digjitale nuk ka rëndësi se çfarë parametrash ka televizori juaj. E domosdoshme është që të pajiseni me një dekoder të jashtëm Universal DVB-T2, ose një televizor i cili të ketë të inkorporuar këtë tip dekoderi.

  1. Cila është lista e kanaleve që mund të ndiqen gjatë transmetimeve digjitale?

Lista e kanaleve është në varësi të qarkut ku ju banoni. Kanalet e lira (pa pagesë) që mund të shikohen do të jenë të gjithë kanalet e operatorëve kombëtarë (RTSH-së dhe operatorëve private), si dhe kanalet lokale/rajonale që më parë transmetonin në analog në qarkun tuaj.

  1. A duhet të paguajë për të parë transmetimet digjitale?

Transmetimet digjitale ofrohen pa pagesë dhe me pagesë. Kanalet e lira (pa pagesë) janë të gjithë kanalet e operatorëve kombëtarë (RTSH-së dhe operatorëve privat) si dhe kanalet lokale/rajonale që më parë transmetonin në analog në qarkun tuaj. Aktuaklisht, ne teknologjine digjjitale mund te shikohen te pakten 34 kanale pa pagese.

  1. A duhet të pajisem me antenë apo satelit?

Digjitalizimi i transmetimeve televizive lidhet vetëm me transmetimet tokësore dhe jo ato satelitore, kabllore apo IPTV. Për të aksesuar këto transmetime mund të provoni me antenën që keni pasur në përdorim për transmetimet analoge, pa pasur nevojë të blini antenë tjetër.

  1. Unë kam një televizor me dekoder DVB-T2 të integruar. Çfarë duhet të bëj që të shikoj transmetimet digjitale?

Televizorin tuaj duhet t’a lidhni me antenën dhe më pas vendoseni në kërkim automatik për të gjetur kanalet digjitale. Duhet të kini parasysh se, ndryshe nga transmetimet analoge, ku antena mund edhe të jetë drejtuar jo plotësisht nga pika e transmetimit, për transmetimet digjitale drejtimi i antenës ka shumë rëndësi, pasi ndikon drejtpërsëdrejti në marrjen e sinjalit dhe cilësinë e tij.

  1. A nevojitet që çdo televizor në shtëpi të pajiset me dekoder (DVB-T2) më vete?

Nëse televizori e ka të inkorporuar dekoderin DVB-T2 nuk është e nevojshme të blini dekoder të jashtëm. Në të kundërt çdo televizor duhet të pajiset me dekoder të jashtëm. Ofrohet edhe mundësia që të keni një dekodër të vetëm dhe me një ndarës (spliter) sinjali digjital të shpërndahet tek televizorët e tjerë, por në këtë rast tek të gjithë televizorët do të shihet i njëjti kanal televiziv. Pra nuk është mundësia që në televizor të ndryshëm të shihen kanale të ndryshme televizive.

  1. Nëse unë e lidh televizorin me një dekoder të jashtëm DVB-T2, a duhet ti ruaj vetë të gjitha kanalet?

Nëse e vendosni në kërkim automatik televizorin tuaj atëherë kanalet televizive digjitale do ju renditen sipas përcaktimeve të AMA-s. Ndërkohë ju jepet mundësia që t’i rendisni kanalet sipas dëshirës.

  1. Ku mund ta blej dekoderin?

Dekoderi mund të gjendet në pikat e shitjes ku tregtohen pajisje televizive si antena, kabllo televiziv, antena satelitore etj. Vetëm duhet të bëni kujdes që dekoderi të jetë i tipit universal DVB-T2, në mënyrë që të përdorni një dekoder për të gjitha platformat numerike.

  1. Si ta lidh dekoderin me televizorin?

Mënyra e lidhjes së dekoderit me televizorin dhe antenën është shumë e thjeshtë dhe e pagabueshme. Lutem ndiqni udhëzimet e manualit që ndodhet në kutinë e dekoderit.

  1. Sa kushton një dekoder i tipit DVB-T2?

Çmimi dekoderit varion sipas llojit, markës apo vitit të prodhimit. Por, AMA nuk e disponon një informacion të tille, pasi AMA nuk ka autoritetin për te kontrolluar dhe verifikuar cmimin e dekoderave në treg.

  1. Kur të mbarojë digjitalizimi në qarkun tim, a do mundem unë të shikoj më transmetime analoge?

Ju informojmӫ se procesi i digjitalizimit do tӫ ndodhӫ nӫ tӫ gjithӫ Shqipӫrinӫ. Transmetimet analoge do të mbyllen dhe do të kalohet në transmetimet digjitale. Procesi është menduar të zhvillohet me faza, qark pas qarku deri në mbylljen e plotë të transmetimeve analoge në të gjithë vendin. Me mbylljen e transmetimeve analoge në qarkun ku ju banoni, nuk do të mund të shikoni programe televizive nësë nuk pajiseni me dekoder të tipit DVB-T2 ose televizor i cili të ketë të inkorporuar këtë tip dekoderi, në mënyrë që të aksesoni transmetimet digjitale.

Vështirësitë e pajisjes së qytetarëve me dekoderat, AMA vendos rindezjen e transmetimeve televizive analoge për Tiranën dhe Durrësin

Autoriteti i Mediave Audiovizive, AMA ka vendosur rindezjen e transmetimeve televizive analoge deri më 15 janar 2019. Duke folur të martën, më 11 shtator 2018, në një takim me gazetarët në zyrën e tij, kryetari i këtij institucioni, z. Gentian Sala, tha se, vendimi kishte si shkak situatën e krijuar në terren ditët e fundit, kur janë krijuar vështirësi në pajisjen e qytetarëve me dekodera.

Përmes komunikimeve direkt me qytetarët në dy numrat telefonikë të vendosur vetëm për digjitalizimin, si dhe nga inspektimet në pikat e shitjeve të dekoderave në qarqet e Tiranës dhe të Durrësit, ku ka kërkesa të jashtëzakonshme për këtë pajisje, AMA ka evidentuar problematika të cilat kërkojnë kohë për t’u zgjidhur.

Pavarësisht detyrimeve që ka vendi ynë në procesin e integrimit evropian, si dhe kërkesave të rezolutës së Kuvendit të Shqipërisë, për ta përmbyllur sa më parë procesin e digjitalizimit, kryetari i Autoritetit tha se interesi i publikut dhe siguria për të garantuar të drejtën kushtetuese të qytetarëve për informim na detyrojmë ta shtyjmë edhe 4 muaj procesin, në mënyrë që të normalizojmë situatën.

Gjatë këtyre katër muajve, deri më 15 janar 2019, z. Sala, tha se do të ketë bashkëveprim të të dy teknologjive, asaj digjitale dhe analoge, por nuk do të lejohen që të hyjnë në transmetim kanale digjitale të palicencuara.

Ai tha se AMA do të vijojë dinamikën e informimit dhe ndërgjegjësimit të qytetarëve për t’i orientuar në kushtet e realitetit të ri të transmetimeve televizive digjitale.

Autoriteti i Mediave Audiovizive

11 shtator 2018